Home Opinion Kamanaw Anna Geggek

Kamanaw Anna Geggek

Masiddu mabba nono ku ta reklamo na senior citizens ira asunto na medisina gatangadda. Kanayun awan kanu. Ta kunnaw nga mesissimmu, mapanono tam y negagangay nga tumattam. Ari maggafu ta maski anni nga botika onu sinni laman nga doctor. Maggafu laman ta pallevu.

Apparaddu pattolayna mannakam gari ta simple mabba laman y mattolay. Malukak ka, umay nga ta trabahum, kumakka, makkatruk tapenu malukak ka mangana sonu metunuk nga umma. Nu ariakka malukak, baka sobra gapa kinnammu onu akkagianattam nga Ibanag, naam-am ka, nanagga, natay.

Paggi ngamin nga taki na baggui, egga remedyo tam. Mamegafu ta tuppak na vu adde ta dapang, egga malatam nga uru maggafu ta mula-mula ta pallevu tam. Tapenu marenu y ulum anna makkilak y vumu, mattugi ka laman ta nagammayan para aratang. Nu mataki vuvvumu, payyammu laman daggo na natuggi nga katul. Nu makkursuka, mattunu ka laman ta datu nga dupo anna nu magangkika, aru gamma y lagundi.

-000-

Nu nabigarakka, mamobbo ka laman ta marunggay ngem nu napannu ta kutu y ulu na abbing, tadday laman y kapianan nga remedyo: kukkupammu y abbing. Nu ikakaya naka na kamanaw, egga don na Acapulco. Nu gineggek ka onu kiniriki, mabbaggao ka laman ta napalwak nga don na bayabo. Ta trangkaso gapa, vukkutammu ta napia y baggim adde ta maguggang ka, makkaldo ka gapa na karne na manu nga napannu ta laya anna vunga na sili.

Ngem nakwa ta pattallung na comercialismo, nattamanna kari ngana na Ybanag ira yaw nga remedyo? Awappaga. Talakak tam laman nga magiprepara. Ikaya tam y nalogon laman ngana ta aru garay  trabahu tam. Nu egga mataki ta baggim, pain reliever ngana ngam anne ta mappamasahe ka paga ta denu nga natanglak turi ta Biernes Santo.

-000-

Ta niakan laman, alale mas nasikan ngana garay y epekto  na telebisyon anna  karwan paga nga klase na media yatutta medyu umarayyu tam ngana ta negagangay nga  paggafuanna uru tam. Innannu laman ngana y nesimmu ta mula nga marabatuni (tawwa-tawwa).  Usanna Ybanag yaw para ta kupol kabalimmu nallullung ta nariki nga manga, nga binarakmu gamma laman ta karrubam. Ta Kalinga ira, usadda yaw para ta Dengue. Ngem anni kingwa na Department of Health? Awan kanu naestudyo na siencia nga maka-uru yaw. Wan ngam. Sinni gafu paga sangaw   mahospital nu napamappia na tadday laman nga kaddo y dengue. Nu karwan, tarawwo ira yaw nga sector. Ulapa ira, kaladeng.

Y don gapa na Lagundi, ta bayak tam ngana nga neusa, sangaw laman nga nakua nga uru pang-comercio. Kaya na kaggian gafu, mas malalaki y mannakam tam ira nga makakalek ta  mula nga makauru anne ta maddaggun nga medicina?

Ngem y singgo na, gafu na nassikkan y negosyo na Lagundi nga uru, egga gapa artista ta telebisyon nga kaya na darallan y Lagundi. Siyempre, yayya y endorser, dakal y pagana, milyones. Yari laman ta nu anni gapa y konsensiyana nga manaral. Awayya na gamma ilaku yari  produkto nga inendorsona nga ari mappas-pasagid.Ta pangultimowan, mariga likuran y gannuk nga maski mabba ikagira nga kadaanan,  makoffun ta mariga nga magaru. Je, pakeekwa nu mattuma ta synthetic ira nga uru, makammu kamu. TNF

 

Advertisement
Load More Related Articles
Load More By The Northern Forum
Load More In Opinion
Comments are closed.

Check Also

Nature Answers to the Incessant Prayer of Cagayanos

The call for prayers for safety among netizens of Cagayanos has flooded the social media n…