Home Opinion Marake Nu Ibanag, Mapia Nu Inglis

Marake Nu Ibanag, Mapia Nu Inglis

101

Mawwang alimuroku nu karwan. Ta kabbingtam, ivuddo tam laman y billay na babay onu lalaki, tammarradda ngana y bibik mu. Marakay kanu yari nga ergo. Mapporay kanu y Pari, baka ariakka kanu makakadde ta pamaddobanna Diyos nikaw.

Naddetattam y nagabbing nga lappaw anna mammanu y aggagal tam taw nga gannuk. Egga paga illukna. Tapenu makalisi laman ta pattamarna Magana ta dunggu tam, ariattam vuyatan y __sin anna pe__. Natural nga minaggegek y Ibanag. Napappannu tam ta _nam, _sti, diab_ onu anni laman nga ergo nga marakay kanu.

Nu karwan, depende laman ngana ta kausa na anna ta passalammona tolay nga kergom. Duma kebalinanna na ergo nga _enam nu magayaya na. Duma gapa pattallungna nu maguzzu-uzzin y muka mu ta gazzi nga emmu nevuddu yaw. Netiempo nga egga precidente tam nga keayana magergo ta kunnaw. Anningan na moralista ira, bastus kanu yayya, mavuyu-uvyu anna nadaping y simu na. Ari kari nga nu maggegek moralista ira, awam mappanunnu?

-000-

Taw tullung y diferencia na Ibanag anna Inglis. Nu Inglis, awayya tam laman ikagi y ‘devil.’ Nu Ibanag, marake nu ikagi tam y ‘diablu.’ Anni naddiferencianna dua, Father Bernie Corpuz? Nu ivuyatam y ‘pesti,’ marake kanu, ngem nu Pest ta Inglis, mapia. Maski sitaw nga aggikmu innam, ngatta ta marake y Pesti ngem ari marake y pest.

Ipatalattonu nge niakan, sikamu nga siguradu madderecho ta langi?

Tadday nga ergo na Ibanag nga marake kanu mevuddo ay y manga_ _. Bastus ka kanu nga Ybanag nu mallawan ta simumu yaw nga ergo. Ivu: ngatta gafu nga nu ikagi na abbing ira y F__k Y_ _, e awayya na laman? Anni, maski negagangay nga ergo tam, ipasirattam nga ivuddo mabba. Nu kunnatun, vurrattam laman ngana siguru ta vokabularyo tam ira yatun nga ergo. Nu ngatta garay gapa nga egga makagi nga double standard.

-000-

Aru ngana mavurung ta aranni kanu ngana mawawan y Ibanag. Yaw paga y rason nu ngatta ta vinukatanna The Northern Forum yaw nga pagergowan tapenu laman nepatalatto ta magaru y negagangay nga uvovug tam.

Ngem nu kunnatun nga sittam mismu nga mangiusa taw nga ergo maporyan nu usattam, anniko ko kako, dakal nga logo ngam. Ammu tam ngamin nga y uvovuk na tadday nga grupo na tolay y mappazikko ta kada aggaw nga pattolayda. Yaw y pamegafuanan na culturara, tradisyon anna ngamin nga gannuk ta pakkatolayra.

Ngem nu mawawan y uvovug, mawawan y kultura, mawawan y negagangay. Sitaw tam gafu, Ybanag onu Inglis? TNF

Load More Related Articles
Load More In Opinion
Comments are closed.

Check Also

Talatto: Minallappak si Ma’am

Nagadde ta langi y gazzina netizens ira ta mestra nga nagafu nallappak ta Kindergarten nga…