Home Opinion Pulitiko Gapa y Sardinas

Pulitiko Gapa y Sardinas

Egga uzzin, berde, furaw, anna asul nga sardinas. Taggimittan laman nga kanan na riku ira yaw. Kappasiran garay nga kuman ira ta sardinas, e egga kayara ta pattolay. Y kuman laman taw ay y mariga nemanno nu tiempo na bisin onu anni laman nga calamidad. Aru gapa riku nga kuman ta sardinas ngem sekreto laman ngam. Siyempre, kappasirannu nakakoche ka, egga dakadakal nga airconmu e sardinas gabba laman kinnammu.

Nu keraddammattan, election campaign ni Cory Aquino y linya nga “maski y galonggong, ginarura ngana ta lamesa na mariga.” Ta nappasa nga bayabbak na Baju nga si Lawin, ensegida nagguyu ngamin y ajencia na gobernu maski y sector na pribadu. Mapia kummu ta maski nasassassa gibbalayan, poste na kuryente anna karwan ira paga nga babalay, baddi laman nadannal.

Ngem, anni mabba, Uncle Eru, maski mabba sardinas “ginarura gapa ngana ta lima na biktima ni Lawin”. Ari laman nga yatun, pati sardinas, egga gapa ngana political party na? Jesus Maria Josefa Taguinod na Annafunan!

-000-

Namummukki nga kumikkikki y narreklamo ta olu aggaw pagalaman na relief goods distributions. Gavva, napplasta y nadumaduma nga kolor ta kapitans ira, kagitta laggapa na kolor na sardinas. Nepemmang ni Kapitan y distribution. Pinili laman ni Kapitan y olu nga nedda. Ginaddua ni Kapitan y naggafu ta DSWD.

Amme napplasta si Kapitan kabalin na baju.

Y marake, alale Engineer si Kapitan. Markanna y umay manga ta relief goods. Nu Arianna kakolor, maginnak ka labbi. Nu kakolorna, mappolu ka ta fila. Sobra nga insulto paga maggafu ta naga iburnal ta daping nga simu na. “Sige, manga kamu ta relief goods. Maddanuk kamu mangana sangaw ta media nga kinoko ira yatun.” Kunna tadday nga Kapitan taw ta Tuguegarao.

Y tadday gapa, medju nav-Vong Navarro, swabe laman ergo na: O, kunnasi gafu yatun sonu election?

Ngem, nu manginsulto si Kapitan, afu, afu dakal uffu, mas grabe mamba Angeles na ira.

-000-

“Abbomu nu naggafu ta bolsara y iyawa na nikami. Aggamundu, siguru ari napagustuan. Makaddaral na aggaw. Maki-fila ka lagu ngana, popporiadda kamu paga. Ju, pinanawakku fila. Jekaw, paggi ibarakku ta frente na y sardinas tapenu mammuakku kolor na daga na,” kunna kakurugan nga nevuddo na tadday nga tolay niakan ta nappasa nga ligguan.

Ngatta pano kunnari? Egga pano dorob nga naresibira nga mawak pilliada y kolor na manga ta sardinas? Napia laman kummu ta ari sinalyan ni Kapitan ta muka na nga guapo y etiketa na sardinas. Gavva sangaw mabbalin ta brand na sardinas muka na. “Kapitan Sardines in Mackerel Sauce.”

Abboku nu nagimmang ngana y kunnaw nga estilu nu tiempo na relief goods operations. Abbo ku nu napanapia nono ngana na karwan ira nga kapitan nga mangalawa ta totolay nga tanakuan kolorda. Awan mabba. Lastima, kada liggu egga si kapitan makiddaw ta ocha ta simban. Dakal paga limusna. Napia kuttam ta Arianna apan patoli na kada lumakak y takkiong este, piggan na limus.

-000-

Ikayaku apan yaw nga oras mappabalo ta ngamin nga sector, indibidwal, grupo anna media nga naddisbelo tapenu maguardiadda y baju. Ammu tam y sakrifisyoda. Mariga panonotan nga maddaggukka mangiyali ta tolay ta evacuation center ta tangngana na baju, mismu nga familyam, egga ira ta tangnga gapa na parehu nga sitwasyon.

Akkagianakku, aru paga aggamatolay nga Mengal. Egga ira ngamin ta Cagayan anna Isabela.(email the writer at benjie.deyro@northernforum.net)

Load More Related Articles
Load More By The Northern Forum
Load More In Opinion

One Comment

  1. Borse Hermes Outlet

    November 25, 2016 at 2:13 AM

    Borse Hermes Outlet

    sve take.Very good, thanks for sharing[url=http://www.crests.com]http://www.crests.org[/url][url=http://www.crests.com/anniversary_wedding_double_crests.htm]http://www.crests.org/anniversary_wedding_double_crests.htm[/url][url=http://www.crests.com/bla…

Check Also

Talatto: Minallappak si Ma’am

Nagadde ta langi y gazzina netizens ira ta mestra nga nagafu nallappak ta Kindergarten nga…