Home Opinion Van Nga Makappatay

Van Nga Makappatay

Tadday mangana laman nga van y nadisgrasya turita tadday nga aggao. Fuera paga yaw ta karwan ira paga nga nadisgrasya nga nesimmu ta tanakuan nga lugar ta Region 2. Walu ragun ngana y nappasa adde ta napakasta nga hustu y national highway ta parte na Nueva Viscaya, aru naireport nga aksidente. Y rason? Ta kastana dalan, ari kanu mafugaddanna driver y makkaskas mammaneho.

Mafugab, nu ari makasta y dalan, magandanto gafu ira? Anniko koneksiyon na makasta nga dalan ta driver. Awattu madisgrasya nu egga disiplina na driver. Alale kanu kangkaritan irana dalan nga mappaspas, total malalaki ira kanu gamma nga mammaneho. Mapia. Ngem kunnasinu pampasaheru ngana y pattakayammu kagitta na bus, van onu jeepney ira?

-000-

Ikayaku iyadde yaw nga agalta ngamin nga driver na van ta interu Cagayan Valley. Segun ta nala tam nga datos, kaskaseru y driver ira nga biyahe Sta. Ana, Cagayan. Ordinaryo laman ngana nga alale pakagabbadda y van mamegafu Tuguegarao addeta Sta. Ana mattoli.

Y rasonna tanakuan nga drivers, nakuata karrayuna biyahe yatun ta kanayun nga mazzizinnaddagda. Ngem maski sitaw anggulo anningattam, ari mapia kulukukkuadda. Patayadda mabba y mismu nga pasaherura. Nu karwan garay, egga pasaheru nga nu paspas ngana y driver, ariadda ivuya.

Nakagi na tadday nga driver niakan, mawak poryanna pasaheru y kunnaw ira nga driver nu pakaekkuara y kunnaw nga trabahura. Nu ari, nu awayyana anna egga oras paga, awayyam makkadda tapenu arika mapasubo nga madisgrasya.

-000-

Tadday nga problema paga ta van transport, aru pagalaman adde sangaw y colorum o yari van nga ari rehistradu. Nu keraddammattam, tana-tanakuan kolor garina van. Ariammu mammuan nu sinni y colorum onu awan. Turi ta neorderna LTFRB nga mawak, furaw ngana y colorda tapenu mamuan y colorum ira, afu ko afu, dakal nga logo.

Nappapinta gapa ta furaw y colorum ira. Kunnasi tam mammuannu colorum onu awan ya tadday nga van mga mabbieyahe? Awan ira ta fila. Awan papparadadda. Gavva ira laman ngana majjan ta dalan maginnag ta pasaheru. Nu ari garay nga registradu y van, kabbi pasahuruna ira nu egga matay onu madisgraysa. Sinni ko mappaga.

Siyempre y operatorna colorum. Ikayana kagian, malamu makimemallo ta operator nu natayakka nakua ta driver nga barumbadu anna abusadu.

-000-

Nu inasma ka onu attannang kanayun y dagam, ariakka laman ngana mattakay ta van. Maski pang-katorse laman nga pasaheru, ipippipppira y tolay nga mattakay. “Aru paga” nga “ Aru paga “ y ergo. Takkunnaw, ariakka makaguyu ngana ta unak. Maski aircon, napatu ngana. Ariakka komfortable.

Siguru iddattam ta leccion ira yaw nga driver . Nu kunnasi, gobyernu y mappanono nakuata ta pangultimowan, ira gamma y mapaliwa laggapa nu asunto na tranportasyon. Siguro, porbattam y LTFRB nu adde sitaw y pangwa-pangwara ta van ira. Innattambi nu anni actiodda ta kada reklamo nga iyawa tam nira. Pegafuanatam nonumma?- Northernforum.net

Advertisement
Load More Related Articles
Load More By The Northern Forum
Load More In Opinion
Comments are closed.

Check Also

Nature Answers to the Incessant Prayer of Cagayanos

The call for prayers for safety among netizens of Cagayanos has flooded the social media n…